l'éclipse de 1654

Le XIIe dudict mois, environ les neuf heures du matin, commencea l'esclipce du soleilh, qui dura environ une heure et ne fust pas sy grand comme on avoict apréandé. La poeur dudict esclipsce ayant esté sy grande dans toute la ville et province que chascun c'estoict dispozé comme sy seust esté le dernier jour du monde. Quelques astrologues ayant prédict que c'estoict un présage du jugemant dernier à la fin du monde et que la conjoincture des planettes de Mars et de Saturne dans le dict esclipce du soleilh dénotoit par leur malingnité guerres et malladies, dont il plaise à Dieu nous préserver, cela cauza beaucoup de bonnes actions, presque tous les habitants de la ville et de la campaignie c'estant confessés et communiés auparavant et chascun ayant faict provizion d'herbes et de bois pour parfumer les maisons afin de chasser les mauvaises vapeurs des ténébres dudict esclipce, lesquelles les astrologues avoient prédict devoir estre fort grandes et espaisses. Mais, non seulement la consternation estoict grande dans cette ville et province par l'épréhantion dudict esclipce, mais encore par toute la France. Mais, grace à Dieu, cest esclipce ne fust pas grand; il en estoit arrivé, mesme en l'an 1652, pendant les mouvements, un esclipce beaucoup plus affreux. Ledict jour du matin, parmy les dévotions qui se firent, M. le maire, avec un des sindiqs de la ville, assista à la messe, qui fust dicte devant l'autel monseigneur saint Front, patron de ceste ville, pour la santé publique et pour la préserver des malheurs et mauvais esfaictz qui pouvoict s'en ensuivre dudict eslipce de soleilh. On a seu que pleuzieurs huguenots c'estoint convertis à la religion catholique dans ceste province, que pluzieurs réconcilliations de personnes ennemies et plusieurs restitutions de biens c'estoict faictes dans l'apréhantion qu'on avoict de la mort au temps dudict esclipse de soleilh.

retour en haut de la page